مدونات مصريه للجيب

ننتظركم جميعا الخميس القادم السادسه و النصف مساء

فى حفل توقيع اول كتاب يحمل كتابات المدونين

بمكتبة عمر بوك ستورز فوق مطعم فلفله بوسط البلد

شكر خاص للمدونين احمد مهنا و احمد البوهى و المدونه ايناس لطفى

لأنهم اول من تحمس للفكره و جعلوا الحلم حقيقه

معا امام الله

ده مسلم و ده مسيحى

هو ده مسلم و لا مسيحى

ده مسيحى بس كويس

جمل مش هنقدر ننكر اننا بنسمعها و كمان ممكن نكون بنقولها

لا نعرف اننا نخسر كثيرا كلما لجأنا للتقسيم الطائفى فقد يكون بعضنا مسلم و بعضنا مسيحى و لكن الأكيد اننا جميعا مصريون

و لكن كم منا يدرك تلك الحقيقه

نحن نعيش الآن اصعب الحقب الطائفيه فى مصر

ففى حين يصرخ احد الشيوخ ان المسلم الماليزى اقرب للمسلم المصرى من المسيحى المصرى

نجد النصائح للمسيحيات بعدم الأختلاط القوى بالمسلمات

حتى ان تعصبنا قد وصل بنا للهوس الطائفى فى بعض الأحيان فلا اخفى ان بعض اصدقائى يسألوا عن ديانة البائع قبل الشراء حتى اذا توافق مع ديانتهم اشتروا و اذا لم يتوافق بحثوا فى مكان آخر و اقسم بالله ان ذلك يحدث

لكن ده دورنا دلوقتى اننا نقول اننا مصريين

ان الدين لله و الوطن للجميع

لازم كلنا نقتنع اننا مش بنحاسب حد و ربنا هو اللى بيحاسب

عايزين نحس ان همنا واحد و المنا واحد اننا مش اتنين لأ احنا واحد

حلم بسيط بس بجد هيفرق قوى علشان مصر بلدنا

و علشان ابنائنا ينشأوا فى جو و مناخ خالى من الطائفيه

مناخ صحى و نظيف

و انا اثق ان كل واحد لو فكر صح هيلاقى ان التسامح و حب الاآخر هو جوهر

دينه

عايزين كلنا ايدينا فى ايد بعض علشان نكون معا امام الله

هطلب منكم اجابات على استطلاعات رأى نتعرف بيها على اسباب الأحتقان الطائفى فى الجانبين

لو انت مسلم جاوب على الرابط ده

و لو مسيحى جاوب على الرابط ده

حزب الجبهه اهلا بيك جنب اخواتك

لأ دى مش مظاهره ضد الحزب الوطنى

دى وقفه احتجاجيه لأعضاء حزب الجبهه الديمقراطيه 

احجاجا على فصل النائب انور السادات من الحزب بسبب الشكوى المقدمه من د. اسامه الغزالى حرب يتهم فيها السادات بأهانته و التطاول عليه

القرار المفاجىء الذى صدر بحق انور السادات الذى يقر بفصله من حزب الجبهه الديمقراطيه يشوبه - تبعا للائحة الحزب- العديد من الأخطاء 

و على الجبهاويين الرجوع للماده 85 بالفصل السابع المتعلق بالمكتب التنفيذى و الهيئه العليا

و لغير الجبهاويين اقول ان تلك الماده تنص على فصل عضو الهيئه العليا بقرار من الهيئه العليا

 و بموافقة ثلثى اعضاء الهيئه العليا

بينما القرار صدر من المكتب التنفيذى للحزب

و تلك مخالفه واضحه

و قبل ان اتلقى سهام النقد 

اوضح انى لا انتمى لأى من الجبهات التى تتبع د. اسامه الغزالى و لا التى تتبع السادات

فأنا انتمى فقط للجبهه الديمقراطيه و يوم تصنيفى فى جبهة احد سيكون يوم خروجى من الحزب

و لكن اصبح بعض الأعضاء فى الحزب يتعاملون مع المتعاطفين مع السادات كالمتعاطفين مع السفير الأسرائيلى

و كل من يتحدث بخير عن السادات يشعر بأنه مهدد بالفصل من الحزب

لا نعرف نحن شيئا - و لا اقصد احد معين بكلمة نحن- عن العمل الجماعى

فلابد من شيطان و لابد من ملاك

هكذا يتعامل الجبهاويين مع د. اسامه و السادات

و كأنهما ليسو بشر كل منهما يخطىء و يصيب

فيتعامل البعض ان احدهم صواب طول الخط و الآخر مخطىء على طول الخط و العكس صحيح

الآن اشعر بالخجل من نقد الحزب الوطنى

و كما يقول المثل اللى بيته من ازاز

.... 

و الى كل الأخوه فى الجبهه ارجو منكم العمل على توحيد الصف و الكف عن التقسيم و توجيه طاقاتكم خارجيا بدلا من تدميرها و اهدارها داخليا

لا تساهموا ان يلحق حزب الجبهه الذى تمنيتم يوما ان يكون حزب ال77

بحزب الوفد و الغد 

وداعا مجدى مهنا

لم ينافس عموده اليومى شيئا فى استحواذه على بداية صباحى

لم اكن افتح عينى كل صباح على على كلمات عموده فى الممنوع

كان دائما اول ما اتجه اليه و لا استطيع النزول من بيتى قبل قرائته حتى لو كنت متأخره على موعدى

مجدى مهنا ذلك الشخص الذى جعل الملايين يدمنون كلماته و ينشغلون بمعرفة آرائه

هو صحفى من طراز نادر يعمل فى صمت بدون صخب

و رغم ذلك تصل كلماته للملايين

حين اقرأ له اشعر بأرتياح شديد فهو كاتب ليس محسوبا على احد

فلا هو محسوب على ذاك ضد هؤلاء و لا هو مقيد بذلك

و لا هو من محبى الشو الأعلامى

شخص واحد فقط يحسب عليه مجدى مهنا و يتحدث بلسانه و هو القارىء

فلعله اخذ على عاتقه ان يكون ضمير الأمه و صوت الناس لذلك لم يخيب ظن قراءه ابدا

فدوما نقرأ له لنشعر اننا من كتب مقاله

مجدى مهنا كاتب منا و الينا

كم افقتقدته فى تلك الأيام التى توقف فيها عن الكتابه

و كأن شيئا ما ينقصنى

و لكن للأسف سأضطر لأفتقاده دائما

كنت اتمنى ان اكتب له تهنئه بالشفاء

فأكتشفت ان على كتابة رسالة وداع

فلندعو له جميعا بالرحمه و المغفره

وداعا مجدى مهنا

الحمد لله جماهير الأهلى حرقوا جماهير الزمالك

الحمد لله الناس فاقت و قررت تعمل حاجه

و علشان كده قام مشجعى الأهلى الغيورين على اهلويتهم الغاليه بحرق احد مشجعى الزمالك
ايوه كده ايوه كده يا جدعان البلد لازم يبقى فيها رجاله
حقيقى جمال حمدان غلط لما قال ان الشعب المصرى لا يثور لو كان عايش كان هيشوف الثوره التى قادها مشجعى الأهلى على مشجع الزمالك
اذا كان الأهلى سيتسبب فى حرق شخص فليذهب الأهلى الى الجحيم
يعنى كل الناس بتقول الرياضه حلوه الرياضه مفيده. و احنا طبعا آخرنا نشجع لأن مفيش حد بيلعب رياضه اساسا. و فى النهايه حتى يكون التشجيع بذلك التعصب الأعمى
و بعد ان وافق الناس على شراء زجاجة الزيت بقرابة العشره جنيهات

و قبلوا شراء رغيف خبز لا يتعدى عدة سنتيمترات

و لا يمانعوا ان يجثم رئيس على انفاسهم لما يفوق الربع قرن
الا انهم ابوا ان يجرح احدهم ناديهم بكلمه
و كما قال النائب الهمام رجب هلال حميده معلقا على كلام الرئيس مبارك ان مصر هى الأرض و العرض و حاجات كتير من اللى بيقولهم كل مره ايه الحلاوه دى
فأنا هستعير منه الكلمه و امسك الميكروفون و اقول ايه الحلاوه دى
انا كده اطمنت ان سعد زغلول كان عنده حق لما قال مفيش فايده
و المستفز ان احد مشجعى الأهلى بيبرر لى ما حدث بأن ذلك الشخص المجنى عليه قد اهان الأهلى اهانه بالغه
لأ عنده حق ازاى يهين الأهلى حتى عيب

يبقى نحرقه
و زى ما التاريخ شهد محارق نازيه ده عهد المحارق الأهلاويه
و بعد الفتن الطائفيه سنشهد عهد الفتن الرياضيه و ده دليل على التطور الطبيعى للمجتمع المصرى
و قال بنتكلم ليل نهار فى حرية التعبير و حريه الفكر و اساسا الناس مش قادره تتقبل الأختلاف بين ناديين
ده السكه طوييييله بشكل

اعتقد اننا فى حاجه ان نبدأ من الصفر
و اتمنى ان يكون تم القبض على مشجعى الأهلى المعتدين و لا هيطنشوا زى ما بيطنشوا مشعلى الفتن الطائفيه
يعنى اذا افترضنا الراجل ده كان مات كان هيبقى شهيد الأهلى و لا ايه؟
و الشخص اللى قتلوا كان مثلا هياخد اعدام فداء للأهلى
و نجد المظاهرات التى تهتف فداك ابى و امى يا اهلى
الأهلى فوق الجميع. جميع مين دول اللى الأهلى فوقهم
الغريبه ان ده كان شعار هتلر ان المانيا فوق الجميع و طبعا كان حقه راجل وطنى بلده فوق الجميع
لكن الشعار على ما وصل هنا بدل ما نقول مصر فوق الجميع بقى الأهلى فوق الجميع
اذا كان ده شعب مصر يبقى لكى الله يا مصر

فليبدأ عصر الثوره الحمراء على غرار الثوره البرتقاليه
و الله يرحمك يا سعد

عيد الشرطه و معبر رفح و اشياء اخرى

1

احتفالا بأعياد الشرطه. وايمانا منى بالدور العظيم للشرطه المصريه على قفا المواطنين المصريين

قلت ارجع علشان نحتفل بعيد الشرطه القومى الوطنى. و بالمناسبه دى نهنىء الشرطه

و بما ان الشرطه فى خدمة الشعب و طبعا الخدمه هنا شىء نسبى بدون تعريف محدد

و كل واحد بيحدد الخدمه من وجهة نظره

فالشعب لازم يصبح على الشرطه فى عيدها و لازم نسمع سلام يا ظالمنى
و بهذه المناسبه نذكر اجهزة الشرطه المصريه بأنجازاتها فى العام المنصرم

و اهمها الفشل الذريع فى القبض على سفاح بنى مزار

و فشلها الأذرع فى القبض على سفاح المعادى الى غير ذلك من الأنجازات

و بعد التحيه و الذى منه اهدى الشرطه المصريه هذه الفيديوهات

لكى تتذكر ابداعاتها التى لا مثيل لها فى التعذيب و التى من المنتظر ان تدرس فى العالم

بس يا ريت يسجلوها براءة اختراع. رغم ان كده الأختراع هيفقد برائته

فيديو 1

فيديو 2

فيديو 3


2

بدايه لابد منها لازم اقول انى كنت سعيده جدا بفتح معبر رفح للفلسطينيين. لدرجة انى بكيت تأثرا بمشهد تدفق الفلسطينيين على رفح.
لكن – استدراك لا بد منه – هل تفجير جزء من سور معبر رفح بهذا الشكل يمكن السكوت عنه؟

هل ده مش عمل اجرامى؟
اعترض على اغلاق المعبر لا مشكله فى ذلك.

بل و اتمنى ان يظل المعبر مفتوح دوما لكل من يريد شراء احتياجاته و عودته مره اخرى.

فغلق المعبر بالشكل المتعنت غلط بل و عمل لا آدمى.
لكن مش معنى كده تفجير المعبر و محاولة الدخول بالقوه.
هذا التصرف مرفوض و قد يؤدى هذا الى فقدان الكثير من التعاطف مع الفلسطينيين

فلينضم هذا الموقف الى اشقائه من المواقف المخزيه من الشعب الفلسطينى فى حق مصر

و لعل ابرزها ضرب وزير الخارجيه السابق احمد ماهر بالأحذيه

بصرف النظر عن اختلافنا مع اى وزير فهو فى النهايه يحمل اسم مصر. و اهانته اهانه لمصر

و ارجو من اى شخص يغضب من هذا الكلام ان يلقى نظره على
هذا المقال




3

اشعر احيانا بل و كثيرا انى بكتب بدون فائده. لذلك فكرت القيام بعمل هادف يكون له فائده.
بدايه منطقيه و استلال لابد منه. و بعدين؟

عندك بطاقه انتخابيه؟
طيب لسه عندك وقت تطلع بطاقه انتخابيه. صدقنى بلاش تقول انها من غير فايده

هى ممكن يكون ليها فايده
انا كواحده من حزب الجبهه الديمقراطيه عاصرت تجربه مريره للحزب فى انتخابات دائرة المنيل لمجلس الشعب

انتهت بأنسحاب مرشح الحزب قبل اعلان النتيجه

اللى كانت بالطبع لصالح مرشح الوطنى

لو انت عندك بطاقه انتخابيه اكيد مش هتمنع التزوير بس على الأقل هتمنع ان حد يزور بأسمك

و ممكن ترشح الشخص اللى انت عايزه و يكون ليك رأى

فى الأول هيكون صعب بس لما كلنا يكون معانا بطاقه مش هيقدروا على التزوير بدرجه عاليه.
بلاش سلبيه..........فكر بأيجابيه.

اللواء احمد ضياء الدين يتسائل الرأى العام مخنوق من الشرطه ليه؟

ليه ......ليه؟ يا ترى ليه؟
تفتكروا ليه؟

الحقيقه استفزنى جدا تساؤل -مساعد وزير الداخليه للشئون القانونيه -احمد ضياء الدين فى مداخله تليفونيه فى برنامج العاشره مساء. عن سر توجه الرأى العام ضد الشرطه. مستنكرا الفرحه الشديده

التى سادت
بسبب الحكم بسجن المجرم اسلام نبيه



كيف يتعاطف الرأى العام مع من يرفض معاملته بطريقه انسانيه؟

من الأولى ان يتسائل سيادة اللواء لماذا ينادى معظم الظباط على اى متهم او مشتبه فيه او حتى شخص عادى

بكلمة يالا

فليتسائل لماذا يجب مناداة ظابط الشرطه بكلمة باشا

فليتسائل عن حالات الوفاه الناجمه عن التعذيب التى من الصعب حصرها ليس آخرها
قتيل شها


و امام كل حالة وفاه

نتجت عن التعذيب هناك على الأقل عدة حالات لم تنتهى بالوفاه

الم يسمع او يشاهد كليبات التعذيب
الم يتصفح جرائم ظباط الشرطه على صفحات الجرائد

الا يعرف ان كلمة ظابط مرتبطه فى ذهن المواطن البسيط بالضرب على القفا

تساؤل اللواء لا يدل الا على شيئين. اما انه يحاول تجميل صورة جهاز الشرطه.
او انه لا يعرف حقا حجم الأنتهاكات

فلو انه يحاول تجميل صورة الجهاز. فمن الأسهل اصدار قرارات للظباط بعدم انتهاك القانون و حفظ كرامة المواطنين. و الألتزام بمواثيق حقوق الأنسان.
لا سيما ان مصر عضو فى مجلس حقوق الأنسان. مع انى مش عارفه تيجى ازاى دى بس اللى حصل
اما لو انه لا يعرف و هو مساعد الوزير. فتلك كارثه اكبر. لأن ذلك يعنى انهم بعيدون كل البعد عن المواطنين. و لا يعرفوا شيئا عن شكواهم و ما يحدث فى حقهم

لهذه الأسباب و غيرها لا يمكن انكار فرحتنا الشديده بحبس اسلام نبيه

و يا ريته كان خد حبس ستين سنه مش بس تلاته

و ان شاء الله دى تكون نهاية اى حد بيستغل سلطته ضد الناس

المهم ان نفس اللواء ظهر مره اخرى على برنامج 90 دقيقه بقناة المحور

بسبب حالة وفاه جديده لمواطن بقسم العمرانيه

ليؤكد انه لا يوجد خلل او ظاهره

و لكن المشكله فى رأيه هى العولمه التى ادت لظهور تلك القضايا

و تفسير الكلام ان مش مشكله ان فى قضايا تعذيب لكن المشكله ان الناس بتعرف اخبارها

و لا تعليق

الملك فاروق و الملكيه و التوريث

لأول مره يتناول مسلسل الملك فاروق حياة الأسره المالكه بشكل مختلف عن الذى اعتدنا عليه
فدائما و لابد ان يظهر الملك فاروق على وجه التحديد بأنه فاسد الى اقصى درجه و لا يفكر الا فى نزواته فقط
و ربما لهذا السبب تابع عدد كبير مسلسل الملك فاروق رغبة فى التعرف عليه بدون زيف
بدون انحياز معه او ضده فعهده عهد قد انتهى و لن يعود. و هناك رغبه فى التعرف على تاريخ مصر

الغريب هنا هو ذلك الرعب الذى اصاب بعض رموز الحكم و صحفيى الحكومه من تعاطف الناس مع الملك فاروق
لدرجه جعلت روزا اليوسف تقدم عدد كامل عن مميزات العهد الجمهورى
الى جانب عدد من المقالات لكتاب مختلفين عن هل ستعود الملكيه
و الخوف من الملكيه و ما الى ذلك

لدرجة انى كنت قد قاربت على الأقتناع اننا فى جمهوريه بجد


الحقيقه فى كلا العهدين الملكى و الجمهورى لم يتدخل الشعب لأختيار رئيسه او ملكه
الفرق ان فى الملكيه بنكون عارفين ولى العهد
لكن فى الجمهوريه بتفاجئنا الأقدار

تماما كما اننا رهن اشارة الرئيس كما اننا كنا رهن اشارة الملك
مع الأخذ فى الأعتبار ان الملك كان يقيم حسابا للقوى المعارضه و على رأسها حزب الوفد القديم
فى حين لا يقيم احد حسابا لأى شخص فى العهد الجمهورى






الخوف الحقيقى فى رأيى مش من تعاطف الناس مع الملك فاروق
لأن اكيد الناس مش هيصحوا الصبح يقولوا عايزين مصر تكون ملكيه لأن مش بأرادتهم طبعا و الا كان زمانهم غيروا شوية رؤساء على الماشى
لكن لماذا الذعر من الملكيه رغم مرور ما يزيد عن نصف قرن على الثوره التى اطاحت بها؟

تذكرت فجأه حوارا صحفيا كان قد تم مع الملك احمد فؤاد ابن الملك فاروق من قرابة عام. و كان يتحدث عن المضايقات التى تواجهه فى الدخول الى مصر و ما الى ذلك


الخوف هو من زيادة العقبات فى طريق توريث الحكم
بحيث اذا تم التوريث فى العهد الجمهورى ستظهر تساؤلات من نوعية لماذا اذن قامت الثوره
لماذا اذن الأنقلاب على الملك و يبدأ البحث فى الملفات القديمه
و بالتالى قد يصل البعض ان بما انه كده توريث و كده توريث فليسلم عرش مصر الى الملك احمد فؤاد ابن الملك فاروق بأعتباره الوريث الشرعى للعرش

.

.

.

.

.

.

خارج النص

محمد على ابراهيم يحرض على استخدام القوه مع الأضرابات

اقتباس من الجمهوريه:

الناس تتصور أنها تتحدي الدولة. والحكومة لاتستطيع في وقت سمحت فيه بالديموقراطية والحراك السياسي أن تتعامل بعنف شديد مع هذه الإضرابات. وإن كان من حقها حماية العدالة وترسيخها والحفاظ علي حقوق المواطنين

.

.

ربنا لا تؤاخذنا بما فعل السفاء منا يا رب العالمين

محمد على ابراهيم........... مش هتقدر تغمض عينيك

رغم انى و الحمد لله لا اقرأ الصحف الحكوميه الا قليلا. الا انى تصفحت مقالات محمد على ابراهيم رئيس تحرير جريدة الجمهوريه طيلة عدة ايام ماضيه.
و الحقيقه لا اعرف لماذا اصريت على قراءة تلك المقالات
و تعجبت جدا من عدة نقاط و رؤى استعرضها هو


سأستعرض بعض مما جاء بكتابات محمد على ابراهيم معكم
و ارجوكم رجاء خاص بلاش حد يعدى عليا

الكلام المنقول من كتاباته بالأحمر
و تعليقى بالأسود

دلوني علي إضراب واحد في العالم كله من شرقه إلي غربه يطالب فيه العمال بحضور رئيس الجمهورية ورئيس الوزراء ليحلوا أو يسمعوا لمشاكلهم؟

والله عنده حق . اتفق جدا ان الكلام ده صحيح

لأن ببساطه دول العالم من شرقه لغربه لا تعتمد كل احوالها و تعقد كل آمالها على رئيس الوزراء و رئيس الجمهوريه
و الحقيقه الكلام ده اكبر دليل ان مصر مش دولة مؤسسات


لو فكرت الدولة بمنطق من الذي سيخسر ومن سيفوز؟ فإنها ستكون عفواً قد تنازلت عن هيبتها ومكانتها وأصبحت في موقف تنتصر فيه مرة وتنهزم أخري. ومصر لن تنزل لهذا المستوي أبداً.. والحكومة لن تترك قراراتها واصلاحاتها رهنا لرضا الشعب أو غضبه. فساعتها لن تكون دولة.
متحدثا عن ازمة عمال المحله

ايه المكتوب ده؟
ازاى بس الكلام ده
يعنى الدوله لو سمعت كلام الناس و حققت مطالبهم تبقى فقدت هيبتها؟
و نعم الديمقراطيه. لأ طبعا مش معقول الحكومه تترك قرارتها رهنا لرضا الشعب
شعب ايه؟ و هو الشعب ماله اساسا

يمكن يقصد ان الدوله لو رضخت للشعب ستصبح دوله محترمه

و الدوله المحترمه تعتبر فى رأيه مش دوله


ودعوني اسأل هؤلاء العمال. هل هذا التصرف الذي أقدمتم عليه هو المثال الذي ستتركونه لأولادكم وعائلاتكم؟ لقد كان عمال المحلة وغيرها من القلاع الصناعية الضخمة في مصر يسعون ويجاهدون كي يلتحق ابناؤهم بتلك المصانع بعد تقاعدهم. بل انهم يفضلون الخروج علي "معاش مبكر" حتي يحصل أولادهم علي فرصة سريعة للعمل.. ماذا حدث لهذا المفهوم؟ هل سيتركون لأولادهم خرابات وأطلالاً تنعق فيها البوم والغربان؟ هل هانت "العشرة" علي العمال الذين كانوا يرتبطون بعلاقات نفسية مع ماكيناتهم وأماكن عملهم؟

لا والله عندك حق العشره متهونش يا راجل
دول عشره مع المكن و اماكن العمل
و علشان العشره مفيش داعى يأكلوا العيال و لا حتى يربوهم
و لا فى داعى للعيال اساسا



قرأت كتاب د.سيار الجميل المؤرخ العراقي الأشهر الذي يعيش ويعمل في كندا
من خلال قراءة سريعة لفصول الكتاب عرفت لماذا انتشر هيكل؟ وهذا هو أول سؤال يجيب عنه الكتاب.. انتشر لأنه كان الكاتب الأوحد. ولأن الناس أحبت عبدالناصر وصدقته. فقد أحبت صديقه وصدقته..

لا اعرف لماذا يتصيد محمد على ابراهيم الأخبار التى تكتب ضد هيكل
و هل كان سيتخذ نفس الموقف لو كان هيكل يدعم نظام مبارك؟


الرئيس مبارك حارب معركة أكتوبر والعالم تتنازعه قوتان. فلما أفل نجم الاتحاد السوفيتي وانتهي وتفكك عرف الرئيس حسني مبارك كيف يعيش بعدها مع قوة عظمي وحيدة. ولم تنحرف قيادته للسفينة بوصة واحدة أيام كانت هذه القوة تتحسس طريقها وتحاول تجميل صورتها في أعين العرب.

يااااااااااه رغم ان انا اعرف حرب اكتوبر من 20 سنه
لكن الحقيقه اول مره اعرف ان الرئيس مبارك هو اللى حارب المعركه. حتى ان الرئيس نفسه لم يقل هذا الكلام
كنت فاكره ان السادات هو اللى خاض المعركه
مفيش مشكله نكتب التاريخ من الأول
و لا تزعل نفسك

عذراً يا سادة لم يشعر أحد بالاحتجاب ليس لأن اليوم أجازة رسمية. ولكن لأن الاحتجاب خاص بعلاقة الصحافة الخاصة بالحكومة وبعض مشاكلها الأخري. وأعتقد أنكم مازلتم بعيدين عن الارتباط الحقيقي بالجماهير

متحدثا عن احتجاب الصحف احتجاجا على حبس الصحفيين

و بما ان احدا لم يشعر بالأحتجاب فلم يكتب عنه سوى معظم رؤساء تحرير الصحف القوميه ان لم يكن كلهم
و خاصة ان محمد على ابراهيم كتب عنه اكثر من مقال
واضح انه لم يشعر به مطلقا


إن الصحافة الخاصة احتفلت بيوم كيبور دون أن تدري لأنه وافق هذا العام يوم العاشر من رمضان لأول مرة بعد 34 عاما. والمعروف أن إسرائيل كلها تأخذ إجازة في عيد الغفران أو "يوم كيبور". فهل أرادت الصحافة الخاصة أن تحتجب في ذكري يوم النصر العظيم أو قبله بيوم وذلك لتشترك مع الصحافة الإسرائيلية في شيء؟! ولم لا فكثير من تقارير الصحف الخاصة مستمدة من المواقع الإلكترونية الإسرائيلية أو المعلومات والأبحاث التي تنشرها الصحافة الإسرائيلية عن مصر وحكومتها ورئيسها

ايضا يتحدث عن يوم احتجاب الصحف

واضح انه لم يشعر بالأحتجاب لدرجة انه يكتب عنه لليوم التالى على التوالى
و الأهم انه يلصق صفة الخيانه بالصحف المحتجبه

استاذ محمد على ابراهيم يمكن نكون بحسب رأى رئيس الوزراء الفاضل شعب غير ناضج
و لكنى لا اعتقد بأى حال اننا يجب ان نعامل معاملة الأطفال

نظره على برنامج حزب الأخوان

انهم يريدونها دينيه

تحديث

تم اضافة برنامج حزب الأخوان فى نهاية المقال

لم اكن املك موقف محدد من جماعة الأخوان المسلمين

كنت دائما على الحياد بل و احيانا متعاطفه

و كان يلح على بالى دوما لما لا تفكر الجماعه تأسيس حزب سياسى لتمارس حياتها السياسيه دون شبح الأتهامات بالأنتماء لجماعه محظوره

ربما لأنى كنت اظن ان رأى الجماعه انه لا احزاب فى الأسلام

و من فتره قريبه اعلنت الجماعه عن نيتها تأسيس حزب سياسى و قامت بتوزيع برنامج الحزب على بعض المثقفين ثم عرضته على العامه فى الحقيقه اعجبت جدا بتلك الخطوه و تفائلت كثيرا

و لكن صدمت فيما بعد

ينص البرنامج على انهم يؤيدوا الدوله المدنيه و ان الدوله الأسلاميه هى دوله مدنيه

و ده مكتوب فى البرنامج

جميل جدا و لا مشكله

ثم نجد فيما بعد انهم يريدوا تكوين هيئة من كبار علماء الدين لتكون رقيبه على

تشريعات مجلس الشعب و قرارات الرئيس

اى مدنيه هنا

هل يعرفوا اولا معنى المدنيه

اعتقد انى لو سألت اى شخص يعنى ايه دوله مدنيه هيرد يعنى فصل الدين عن السياسه

ان مراقبة التشريعات السياسيه عن عن طريق لجنه دينيه هو قمة الدوله الدينيه
و لا ادرى لم يتم التلاعب بالألفاظ و لما كل تلك المراوغات

فليكتب الأخوان انهم يريدونها دوله دينيه

لا احد سيعترض حينها فلهم الحق فى اختيار منهجهم و لكن لنا الحق ان نعرف ما يريدوا

تلك ابسط قواعد الشفافيه

فليس من المقبول مثلا ان اقتنع بجماعه تريد دوله مدنيه ثم اجدها تطبق الدوله الدينيه

كفى تناقضات و تلاعب بالألفاظ

الأخوان يريدونها دينيه

و لا بأس فى ما يريدوا

و لكن فليعلنوا بكل وضوح

طلب منى البعض برنامج الحزب للأطلاع عليه و طلب البعض الآخر التأكد مما كتبت بخصوص هيئة كبار العلماء

للأطلاع على البرنامج

اضغط هنا

و النقطه الخاصه بهيئة كبار العلماء هى فى الباب الأول الفصل التالت النقطة التالته

ها قد اتممت الآن عشرون عاما

عشرون عاما مضت بدون ان اشعر
مع اول مكالمه للتهنئه من احدى صديقاتى سرحت للحظات
النهارده عيد ميلادى. حقيقى نسيت و رمضان بقى و ........ايه ده
عيد ميلادى
عيد ميلادى العشرين
كيف مر عشرون عاما. لا اذكر ابدا كل تلك السنوات
اشاهد الصوره التى صورها لى ابى و انا عمرى ساعات. معقول دى انا
العابى التى مازلت والدتى تحتفظ بها
بل و عرائس السبوع الذين لم يتم فتحهم حتى الآن
اعياد ميلادى التى كانت جدتى تعد لى كافة اشكال الحلوى من اجلها
مازلت اذكر حين كان جدى يحملنى و يخرج بى وانا لا اتعدى الثلاث اعوام
حين كنت طفله كنت مدلله كثيرا
فقد كنت اول طفله فى العائله
و نظرا لأنى كان دائما لابد ان يحملنى احد فقد تأخرت فى المشى كثيرا
حين دخلت المدرسه و كان عمرى اربعة اعوام. تعرفت على احدى اقرب صديقاتى حتى الآن
اليوم يتم تعارفنا ستة عشر عاما

اول قصه كتبتها و عمرى احدعشر عاما. قرأها كل المدرسون فى مدرستى و قررت مع صديقاتى-شغل عيال بقى- ان نحولها فيلما ليكون اول فيلم رعب مصرى كده من غير رقابه و لا تصريح و لا اى حاجه
مازلت اذكر حين قررت انشاء مجله ثقافيه تحمل اسم هاميس و كنت قد اتممت الأثنا عشر – و اكمالا لشغل العيال- اتفقت مع مطبعه بنصور عندها ورق انها تطبعهالى كده من غير تصريح و لا وجع دماغ
رغم كل هذا الهذل فقد كنت مقتنعه جدا بكل ما اقوم به حينها
كم مرت السنون بسرعه

كم شعرت بالخوف ذلك اليوم الذى غضب ابى منى فيه كثيرا حين انتقدت نظام الحكم فى موضوع تعبير رغم صغر سنى حينها كنت اربعة عشر عاما

كانت ايام حين كنا نتعاطى دروس الثانويه العامه انا و اتنين من صديقاتى
كان كل المدرسون يتوسمون فى الهدوء و لكن العكس كان صحيحا
كنت بذاكر جامد جدا مش عارفه ده اختفى ليه دلوقتى

ايام الجامعه التى مازالت مستمره رغم عدم حبى لها
لكن يكفى انى عرفت فيها صديقه غاليه جدا. انسانه من الزمن الجميل بجد

عشرين سنه قليل جدا اللى فهمونى بجد
عشرين سنه كتير جدا اللى رفضوا انى اكون مختلفه
عشرون عاما احلى حاجه فيهم مجموعه من الأشخاص اللى سعدت بمعرفتهم
عشرون عاما من الصخب و الضجيج و الأختلاف

عشرين سنه مش عارفه حققت فيهم ايه
بس اللى اعرفوا انى لم احقق ما اريده بعد

اشكر الله على كل ما منحه لى
مش من عادتى اكتب عن نفسى بس كنت محتاجه اكتب الكلام ده
على رأى اللمبى عشرين سنه عدوا فى سنتين

اهلا رمضان

كل سنه و انتوا طيبين

ابراهيم عيسى مره اخرى

هل ستنهى محاكمة صحفى تساؤل الناس عن صحة الرئيس؟

استدعت نيابة امن الدوله العليا ابراهيم عيسى رئيس تحرير جريدة الدستور للمثول امامها يوم الأربعاء المقبل
و التهم الموجهة اليه هى نشره لشائعة مرض الرئيس حسنى مبارك
و تلك التهم حسب تأكيدات البعض اخطر مئة مره من التهمه السابقه التى حوكم بسببها و هى اهانة الرئيس
الملفت هنا ان جميع الصحف تقريبا قد تناولت هذا الموضوع
و ذلك الأستدعاء يكشف الغباء الأمنى الشديد. خاصة و ان جريدة الدستور لم تعد تجذب العديد من القراء بعد المستوى الأقل من العادى للأصدار اليومى للجريده
فى حين تصور البعض ان التحقيق مع احد الصحفيين سينهى بشكل جذرى تلك الشائعات المتعلقه بالرئيس و يخيف من يحاول الأقتراب من تلك المنطقه لاحقا
تلك الحلول الأمنيه شديدة السطحيه تعالج المشكله من السطح
فى حين تترك الجذور بدون علاج


كان من الأجدر تفنيد تلك الشائعه و معرفة ان الحل هو طمأنة الناس على المستقبل المجهول الذى ينتظرهم حيال غياب الرئيس لأى سبب
و نفى الشائعه كان من الأفضل ان يتم بشكل عملى من خلال ظهور الرئيس فور ظهور الشائعه. فمن المنطقى ان يتسائل الناس عن عدم حضور الرئيس لمؤتمر شباب الجامعات
فأذا استطاعوا التخلص من صحفى كيف يمكن التخلص من سبعين مليون متسائل عن المستقبل؟

ما يحدث عجيب حقا فرغم اتهام الأخوان المسلمين و حركة حماس بترويج الشائعه ستتم محاكمة ابراهيم عيسى

هل هى محاكمة بالوكاله

ام انهم يريدوا استغلال الموضوع لضرب الجميع مره واحده

نصيحه للأخوه فى امن الدوله وحدوا الهدف بدلا من ذلك التخبط الذى يكشف المستور اكتر ما هو مكشوف

المعاملة بالمثل

فلنطالب ان تكون المعامله بالمثل
و ان يحاكم كل مروجو الشائعات الحقيقيين
بمعنى ان يتم محاكمة كل الصحفيين الذين يشيدوا ليلا نهارا بحرية الصحافه بتهمة ترويج اشاعات كاذبه
و قياسا على ذلك يتم محاكمة المسئولين الذين يظهروا يوميا للأعلان عن توافر آلاف فرص العمل
و التحقيق مع من يؤكدون ان التعذيب فى أقسام البوليس تهم فرديه
فتلك كلها شائعات هدفها التضليل المتعمد

مدنيه ام دينيه

مصر ليست دوله دينيه بالمعنى المفهوم
و لكنها ايضا ليست دوله مدنيه ابدا
و ذلك لغياب ابسط اعمدة الدوله المدنيه من مواطنه و ديمقراطيه و حريه و غيرهم
فرغم غياب كل تلك المقومات ستجد من يزعم بمدنية مصر
و ستجد من ينفى عنها صفة الدولة الدينيه رغم تدخل المفتى و الكنيسه لتوجيه سير الأنتخابات احيانا
و رغم الجدل و الحوارات الساخنه بين مؤيدى الدوله المدنيه و مريدى الدوله الدينيه

يمكن بنظره سريعه و بدون تعقيد تصنيف مصر كدوله امنيه
ذلك انسب وصف لدوله تعيش تحت رحمة الأمن الذى يتحكم فى كل صغيره من شئونها
عندما تجد دوله تحكم بالأمن والعسكر لا تشك انها دوله فى العنايه المركزه
فجميع الملفات المهمه و القضايا الشائكه يتحكم فيها الأمن بدايه من ملفات الأقباط الى ملفات المعارضين مرورا ببدو سيناء
مصر الآن دوله تعيش على اجهزة التنفس الصناعى

و لكن ماذا عنا نحن

انريدها دوله مدنيه ام دوله دينيه؟

اتمنى ان اعرف آرائكم و ان كنتم تنحازوا لمدنية الدوله ام تريدونها دينيه؟

تاج.............. كلاكيت رابع مره

اتبعت لى تاج من المدون العزيزاحمد المصرى
شكرا ليك يا أحمد

خدوا عندكوا

أحب شخص لقلبك في الدنيا؟
والدتى و والدى من اقرب الشخصيات لقلبى طبعا
و ده لأنهم بدون مجامله خير الأم و الأب اللى شجعونى فى حياتى
و وقفوا جنبى كتير
رغم انى كنت ساعات كتير مش عند حسن ظنهم

انسان مستعد تضحي بحياتك عشانه؟
مش عايزه اقول كلام فلسفى
لكن اكيد اى حد بحبه هكون على استعداد اضحى علشانه
و كمان اى شخص بيقع عليه ظلم
لأن الظلم والقهر اصعب حاجه فى الدنيا
فبيكون عندى استعداد اعمل اى حاجه و اساعد الشخص ده


انسان كرهته لدرجة الجنون و تمنيت لو تمسك سكينة وتنقض وتغرزها فى قلبه تقتله وتقف تبص عليه لجثته وتشفي غليل قلبك؟
غريبه قوى
لسه فى واحده صاحبتى بتقولى ان بقى عندى ميول عدوانيه
هى قالت لحد؟
المهم بالنسبه للسؤال
فى حد او للدقه اتنين نفسى اعمل فيهم اكتر من كده
بس مش هقول اسامى لأنى مش ناويه اضحى بنفسى دلوقتى

ما هو اسم اجمل كتاب كتبه بشر قراته ومحتفظ بيه حتي الان ؟
بحتفظ بكل الكتب اللى بقراها
لكن على وجه الخصوص
كتاب كفاحى لهتلر – ميول عدوانيه بقى- لكن بكون دايما متعاطفه معاه مش عارفه ليه
كتاب الأمير لمكيافيللى لأنه تقريبا بيطبق عملى فى الواقع
و كمان كتاب اليد الخفيه لد. عبد الوهاب المسيرى

اسم كتاب -كتبه بشر برضة- انت متعلق بيه وبتقرأه كل فترة؟
كل دواوين فاروق جويده لازم اجيبها و اقراها كل فتره
و خاصة ديوان كانت لنا اوطان
و ديوان كأن العمر ما كان
رغم ان الكتاب ده مع واحده صاحبتى من مده

جهاز منزلى انت متعلق بيه او بتستخدمه كتير؟
الكومبيوتر

مكان تحس بالراحة النفسية عندما تراه؟
النيل
بحس انه بيعمل لى اب ديت و ريفرش


مكان تحس فيه بالحنين الى شىء لا تدرى ماهو و ذكريات جارفة الى شي؟
شبرا
لأن فيها مدرستى اللى كنت بحبها قوى

مكان تحس بالراحة عندما تدخله؟
الجامع و خصوصا لما نروح نصلى التراويح

اجمل مدينة زرتها داخل مصر؟

بحب اسكندريه و مرسى مطروح

واجمل منظر طبيعي داخل مصر ؟

جبل موسى
رغم انى لم اراه على الحقيقه
لكن نفسى اروح اشوفه و اطلعه

شخصية كارتونية بتحبها؟
بطوط

نوع هاتفك المحمول؟

Nokia 6288

بالنسبة لسرعة بروسيسور الجهاز وحجم الهاردوحجم المواد الاسلامية والكلام دا؟

بلاش الأسئله المحرجه دى
مش بفهم قوى فى الهارد وير
اما بالنسبه للمواد الأسلاميه فهى قليله جدا

أهم هدف انت واضعه لحياتك الآن؟
انجح و اخلص كليه

مواصفات فتاة الأحلام بالنسبة لك؟

اكيد السؤال ده مش تبعى

صف ما يأتى:شعورك لما بتسمع كلمة مصر؟

احاسيس كتير جوه بعض
اهمها انى بكون عايزه ابكى
بجد مصر اتبهدلت جامد وحالها مش كويس ابدا

شعورك لما بتسمع كلام عن اليهود؟

كل ما افتكر موضوع اسرى 67 بيكون نفسى اشرحهم


شعورك لما بتشوف ظابط شرطة؟
بدون كدب
بكون مخنوقه منه من غير ما يعملى حاجه
بصراحه ظابط الشرطه ده اصبح سىء السمعه بالنسبه لى
مع الأعتذار للظباط المحترمين

شعورك لما بتشوف الكناس العجوز فى الطريق؟
و الله الناس دى حالها يصعب على الكافر
مش قادره اوصف شعورى

افكارك تجاه شاب ماشى فى الطريق يلبس جلابية بيضاء قصيرةوعمامة وله لحية وبجيبه السواك وبيده المصحف؟
انا ليبراليه
فالطبيعى انى مؤمنه ان كل حد حر يعمل اللى هو عايزه
يعنى مش من حقى اتدخل او اقول رأيى لأن ده حريته الشخصيه

اسم مدونتك؟

Daylight

لماذا اخترته..وماهي نيتك من وراء اختياره؟
لما اخترت الأسم ده كنت مضطره اختاره بالأنجليزى لأن الكومبيوتر
مش كان بيكتب عربى و انا كنت عايزه اعمل المدونه
لكن انا اخترته لأنى فى انتظار ان يشرق نور الصباح مره اخرى
و زى ما احنا عارفين ان كل ليل بعده نهار
انا بقى مستنيه النهار

هل فكرت في إغلاق مدونتك؟..والسبب؟
كتيييييييييييييييير
السبب انى عندى شعور دائم بردائة ما اقدمه

صورتك في المدونة..رمزيتها؟
انا اخترتها علشان تمشى مع اسم المدونه
هى عباره عن شروق شمس

لماذا دخلت عالم التدوين من الاساس؟
لأنى كنت عايزه اكون صحفيه و كنت بكتب كتير من غير ما انشر
فقلت فرصه كويسه انى انشىء مدونه



احلى جمله قيلت لك فى وصف مدونتك؟
الحمد لله فى جمل كتير قيلت فى وصف المدونه
لكن اى حد عجبته المدونه رأيه يشرفنى


التعليقات بالنسبه لك ..اهميتها؟
لما بكتب بوست بكون عايزه اعرف رد فعل الناس عن الموضوع اللى مكتوب
و هل رأيى متفق مع الناس و لا شايفينه بطريقه تانيه
فبالتالى بحب اسمع وجهات النظر و الآراء
و بجد اى حد بيعلق عندى بكون سعيده انه اتفاعل معايا

مااحلى بوست كتبته ...ضع اللينك ..ثم اذكر لماذا؟
صعب قوى انى احكم على نفسى
لكن انا بحب جدا موضوع
عندما لا تكون الشرطه فى خدمة الشعب
لأنه بيعبر عن ظلم شديد بيقع على ناس كتير

أحلى مدونة قريتها؟
بجد و مش كلام كتييير
بس اخاف انسى حد

أفضل بوست قرأته؟ وضع لينكه؟
برضه و مش مجامله كتير

حد قل ادبه في التعليق؟عملت ايه؟
لأ مفيش حد قل ادبه غير مره واحده تقريبا
و مش فاكره حتى كانت عن ايه
و اتذكر انى مسحت التعليق لأنى لا اسمح بالألفاظ الخارجه على مدونتى

أسوأ مدونة ؟اسوأ بوست؟
مش هقول مش عارفه لكن لما بلاقى حاجه مش عاجبانى مش بدخلها تانى ومش بحفظ اسمها او اللينك بتاعها

باقى الأسئله جاوبت عليها قبل كده فى التاج ده
تاجين مره واحده

ابعت التاج ده
الجحيم
dr. tantawy
micheal
rony
sarah la tulipe rose
The Alien

ارجوكم اى حد يقرا البوست ده يدعى لوالد احمد المصرى لأنه

رايح يعمل عملية قسطرة ودعامة للشريان التاجي بالقلب..ادعوله ربنا يرجعه بالسلامة ويشفيه